بقلم : د/ ناصر محمد فؤاد
بادرني ناجح حين رأني قادما : ياتري رأيك أيه في الناس اللي بتقتل بعضها وليه القادة بتوعهم متقعدش تتكلم سوا وتتفاهم بدل ما تقتل بعض ؟.
العبدلله : كل واحد حر في توجهه السياسي والديني اللي شايف أن الشرعية في التحرير هو حر واللي شايف أن الشرعية في رابعة برضه حر المهم اننا نتكلم بالعقل والمنطق وتبقي الحُجة بالحُجة مش بكلام ميصحش واللي بيتكلم علي رفع راية الأسلام أؤكد لك اللي حصل في مصر من سنة مالوش علاقة بالأسلام حتي الرئاسة في عهد مرسي مقدرتش تلغي رخص الخمور والكباريهات لا دي خلتها تجدد كل 3 سنوات مش كل سنة أو سنتين زي ما كان متبع قبل كده ،وبالنسبة للقادة بتوعهم الحكاية محاولة تمكين فصيل للحكم سواء رابعة أو التحرير هو ده بيت القصيد والناس اللي معتصمه أدوات بيستعملها كل طرف للضغط وعلشان يكسب ارض للتفاوض عليها.
ناجح : أزاي جماعة قعدت 80 سنة تحلم بالحكم والسيطرة علي الدولة وانشاء خلافة ، ومفكرتش أزاي تحكم أو تنشأ خلافتها ، ولما مسكت الحكم قعدت سنة في الحكم وفشلت بجدارة بغض النظر عن الأسباب ؟
العبدلله :الجماعة بقالها 81 سنة في الكلية ولسه في تالتة بس هم لقوا الحل علشان يخلصوا كلية وعلشان كده معتصمين في رابعة وبعدها يتخرجوا.
ناجح : يعني راجعين للحكم ياباشا.
العبد لله : أنا قلت يتتخرجوا مقلتش يرجعوا ، وكل واحد يفهمها زي ماهو عايز ؟.
ناجح : هي ليه الوزارة دي الوحيدة اللي مش بتتكلم عن مكافحة الفساد ، وبقالها تقريبا أسبوع ولا جابت سيرة شفافية ولا حتي ريحتها.
العبدلله : اسمع يا عم ناجح أنا حاحكي لك حكاية وأنت تفهم منها ، كان فيه راجل مهم عنده ناسه اللي بيهتم بيهم وبيراعيهم ، أشتري عربية بحوالي سبعة مليون ، أشتراها مخصوص علشان تخدم ناسه وتريحهم ،والناس تقول دي أكبر عربية في العالم ، لكن العربية مكانتش بتخدم ناسه كويسه وبتوصلهم بعد ما يكونوا داخوا السبع دوخات، العربية كان فيها فيران كتيرة بتجري فيها ، وكانت بتضايق الناس ، بس الناس كانوا بيتعاملوا معاها علشان هي موجودة في العربية ، والناس كانت رغم كل حاجة حياتها ماشية ومش بتشتكي ،الراجل المهم ده قرر يجيب سواق تاني لعربيته لأن السواق الأولاني الناس كانت تعبت منه ومكانش بيعرف يتكلم كويس ،غَير السواق والسواق الجديد أستلم ،السواق بدء يسوق بطريقته وقرف من الفيران وكترتها ،وراح جايب شركة مكافحة وقضي علي الفيران الكبيرة والصغيرة كلهم ، الناس بقت مبسوطة جدا راحت تركب العربية ، السواق يدور العربية الموتور مش بيدور ، الناس نزلت تزق العجل مش بيتحرك ، العربية وقفت في مكانها ومش راضيه تتحرك ولا سنتي واحد.
ناجح : يبقي السواق الجديد غشيم وفاتح صدره وخربها.
العبدلله : لأ يا ناجح السواق راجل كويس وبيعرف يسوق ، بس لازم تعرف أن الفيران هي اللي كانت ممشيه العربية ومن غيرها العربية مش حتمشي ولا تتحرك، يعني زي الطوبة.
ناجح : يعني كان حقه ساب الفيران.
العبدلله : لآ يشيل الفيران واحد ورا التاني ويجيب بدالهم حد يفهم ويكون مش مؤذي.
ناجح : طيب بلاها شفافية وبلاها مكافحة فساد.
وعلي الله قصد السبيل
§ من القلب
صالح طالح سليم وعيان
شجاع جدع خسيس وجبان
محكوم حاكم مسجون وسجان
هو نفس الشخص هو ده الانسان
