بقلم : محمد حنفي
استمرارا لرصدنا لتفاصيل سيناريو الاجتماع الأول لأعضاء حملة التسويق لـ بيوريجي " Purigy " قالت فريدة موجهة حديثها إلى خالد أنت عارف إن فيه كثير من الدراسات الأكاديمية رصدت ظاهرة إن إحساس العملاء بالعلامة التجارية مشابه لإحساسهم بالشخصيات البشرية، مش بس كده، ده كل مسوقي العلامات التجارية الكبيرة يستخدمون ده في رسائلهم التسويقية، علشان كده إحنا في براند "بيوريجي" بنحاول نخلق مشاعر عاطفية بين البراند والعملاء علشان يكون فيه تجاذب بينهم، مش بس علشان المنافع والوظائف المادية اللي بيقدمها البراند، بل علشان يكون فيه توافق وتجاذب بين شخصية البراند وشخصية العميل.
- تمام، كلام مضبوط.
- احنا في بيوريجي واحنا بنطور شخصية البراند استخدمنا شخصية خالد.
- فعلاً.
- ولما جينا نقسم عملاء البراند ونحدد شخصيات المشترين المثاليين buyers persona، كان التقسيم معتمدًا على اللايف استايل والسمات النفسية، واستخدمنا شخصية مي كواحدة من العملاء المثاليين للبراند.
- ودى كانت خطوة ممتازة خلت فيه تفاعل ممتاز بين الجمهور والبراند، ويا ما ضحكنا على بوستات مي اللي بتعملها باسم البراند وكنا بنقول ده اللي عاوزه خالد يعمله معاها.
- بالضبط، فيه تجاذب قوى وواضح بين شخصية البراند يعنى خالد و بين الـ Buyer Persona اللي هي مي؛ وده جعل الحملة والحمد لله تنجح.
- عظيم... إيه هي بقى المشكلة؟
- طيب... كده واضح أن شخصية خالد وشخصية مي مثاليتين لبعض.
- فعلاً.
- وده بالأرقام وبقياس التفاعل.
- تمام.
- المشكلة إن إحنا كنا عاملين أكتر من شخصية مثالية Buyer Persona لعملاء البراند، فكان فيه شخصية مثالية لعملاء البراند اللي هي مي وهي لسه سينجل، وشخصية مثالية لعملاء البراند اللي هي أيضًا مي بس وهي متزوجة.
- ده حقيقي بالإضافة إلى شخصيات تانية، بس أكترهم تجاذب هي شخصية مي.
- لأ... شخصية مي السنجل هي الأكثر تجاذبا وتفاعلا مع شخصية خالد، بس شخصية مي المتزوجة كان فيه تنافر شديد بينها وبين شخصية خالد؛ فكانت شخصية مي المتزوجة أسوأ شخصية من شخصيات المشترين المثاليين من ناحية التجاذب مع شخصية خالد، وده بالأرقام.
- أفهم من كلامك إن إحصائيًا العلاقة العاطفية بين مي السينجل وخالد ممتازة ورائعة، ولكن مي المتزوجة هي على العكس.
- بالضبط كده.
- وعاوزه تقولى إنه ممكن تكون هناك شخصيات تانية هي الأنسب لخالد.
- بالضبط، بس المشكلة بالنسبة لي هي مي، مجتمعنا لسه مش بيرحم البنت المطلقة.
- حيلك حيلك ... واحدة واحدة، إيه مطلقه دي، هو الموضوع وصل خلاص للطلاق.
- مع الأسف ده اللي حيحصل بنسبة كبيرة.
- يا أستاذة فريدة ده ارتباط عن حب مش جواز صالونات.
- فيه 185 ألف حالة طلاق في البلد السنة اللى فاتت، تفتكر دول اتجوزوا جواز صالونات!!! بالعكس.
...للحديث بقية
