بقلم : محمد حنفي

استمرارا لرصدنا لتفاصيل سيناريو الاجتماع الأول لأعضاء حملة التسويق لـ بيوريجي "Purigy " 

قالت فريدة: لو تفتكروا يا خالد ويا مي إن احنا في الأول حتى عملنا تحليل نفسى لك يا خالد؛ علشان أنت شخصية محبوبة من الجميع، وآراؤك وأفكارك تقريبًا عليها إجماع من معظم فئات الجمهور المستهدف، وده كان من الدراسات التسويقية اللي عملناها في الأول.

خالد: يعنى أنا فار تجارب، وفي النهاية عاوزين تقضوا علىّ...

أنا: خالد... لو تفتكر أنا في الأول قعدت معاك وقلت لك إن اختبار الخمسة الكبار Big Five الخاص برسم البروفايل النفسي لك له مشاكل كتير ممكن تظهر، وأنت قلت لى بالنص أنا صافي كالمايه ومعنديش حاجة أحب أخبيها، وكل صفاتي بافتخر بيها، حتى عيوبي فخور بيها وبحبها.

خالد: ده صحيح، بس الموضوع يوصل إنه يتقال لى إن أنا في المستقبل بعد الجواز مش حكون مناسب لمي، لأ ده أنا مش قابله، أستاذة فريدة حضرتك حمامة السلام اللى الكل بيلجأ لها، وكل كابلcouple عنده مشكلة في الشركة بيلجأ لك وبتصلحى بينهم، وأنا ومي الحمد لله منسجمين جدًا مع بعض، تيجى تقولى لنا الكلام ده!!!

فريدة: طب ممكن تخلينى أوضح أكتر المشكلة والحل المقترح.

خالد: أستاذة فريدة حضرتك عارفة كويس قد ايه أنا بحترمك وبعزك، بس آسف أنت بتتدخلى في أمور شخصية خاصة بينا وأنا محبش حد...

مي مقاطعة خالد: ممكن يا خالد نسمع أكتر من فريدة ونفهم الموضوع.

خالد: نفهم إيه!! أنا مش مستوعب اللى إنت بتقوليه يا مي، أنا مش مقتنع بأى كلمه من كلام فريدة، واحنا لسه حنتكلم لو كنا مناسبين لبعض ولا لأ. قال ذلك خالد وقد بدأت نبرات صوته تكون حادة وعالية.

مي: خالد لو سمحت ده مش أسلوب حوار!!!

خالد: بالضبط كده أنا مش عاوز أى حوار في الموضوع ده؛ دى حياتنا وتخصنا، والمفروض احنا بس اللى نناقشها، ده لو في حاجة فيها نقاش أساسًا.

مي: وأنا برفض فرض رأيك بالأسلوب ده..

أنا مقاطعًا مي وخالد: ممكن نهدأ شويه يا شباب ونسمع وجهة نظر فريدة، أنتم عارفين كويس إن فريدة عاوزة لكم الخير.

خالد: الخير!!! الخير إن احنا نسيب بعض !!!

أنا موجهًا كلامي إلى فريدة: أنت قلتى لهم كل الكلام اللى قلتيه لى.

فريدة: أنا قلت لهم الكلام اللى قلته لك، بس خالد مش عاطيني فرصة أكمل كلامي.

خالد ساخرًا: اتفضلي يا أستاذة، هو لسه في كلام تاني؟؟

فريدة: يعلم ربنا قد إيه أنا خايفة عليكم.

خالد: معنديش شك في كده، بس برده آسف يا جماعة أنتم عاوزين تحولوا المشاعر والحب إلى شوية أرقام.

مي: خالد واضح كده إنك مش فاهم حاجة، ده علم.

خالد ساخرا: سيبنا لك العلم.

مي وظهر على وجهها امتعاض شديد من خالد: ممكن كفاية، أنا شفت وش لك جديد عليه؛ وفعلا مش حقدر أستحملك أكتر من كده.

اكفهر وجه خالد وقال لفريدة: عاجبك كده، كده تمام !!!!