بقلم : د . حسام رفاعي
قالت الفتاة .. كنت عايشة مع جدتي .. أيام كتير كانت تمر علينا ظروف صعبة .. ما فيش فلوس .. مثلا خالي لم يرسل نقود هذا الشهر .. عادي .. مثل كل البيوت يأتي وقت ما فيش..
لم أعرف جدتي بتتصرف ازاي .. ولا عندي فكرة!!
في أحد الأيام كيس فلوسها اتسرق في السوق وهو كل ما نملك .. لا يوجد في البيت كله غير 5 جنيهات !!
بصراحة وهي بتبص في الدولاب عيناها دمعتا لدقيقة كده.. وبعدين عملت حاجة كانت هتجنني !!
قالتلي انزلي اشتري ربع كيلو عدس . وعشر بيضات!!
نزلت وانا فاكره إن ده أكل لينا .. بس هي أخدت العدس طبخته وعملته حلو قوي ريحة الزبدة كانت طالعة منه .. وسلقت البيض وحطت معاه ورقة فيها ملح وفلفل وسخنت كام رغيف كانوا عندنا .. وخدت ده كله ونزلت الشارع ادته لجماعة غلابة!!
كنت هتجنن .. واقول لها طب كنت سيبتيلي بيضة .. انت مش بتحبيني قالتلي اصبري شوية !!
وخدتني وطلعنا البيت كنا وقت قبل العصر.. نمنا شوية.. وصحينا علي خبط جامد علي الباب !!
واحد صاحب خالي رجع من السفر.. وجايبلنا معاه فلوس وحاجات كتير حلوة
عشر دقايق عدو كمان .. والباب خبط تاني
ولد من اللي بيقعدو في السوق قال لها إن كيس الفلوس بتاعها وقع قدامه ومكانش يعرف بيتها!!
يومها جدتي قالتلي .. اللقمة تزيح النقمة .. كل ما تضيق بيكي .. وتجدىن روحك مخنوقة .. اطعمي فقير ولا محروم.
طيب لماذا العدس يا ستي .. قالت .. أنا اعملته للناس عشان انا بحبه !!
قدمي للناس من اللقمة اللي تحبيها .. يقوم ربنا يحلي زادك ويفك كربك..
جدتي في الشتاء كانت بتسلق بيض وتوزعه سخن علي عساكر المرور اللي بيقفو في الشارع وعمال النظافة.
والله ما شفت متعة أكتر من إني أعمل أكل بإيدي وأقدمه لحد .. جربوها وانتم مخنوقين .. وهتتفاجئوا من النتيجة..
ألق خبزك علي وجه المياه وسوف يأتي ولو بعد حين..
